Treisio
Y diffiniad cyfreithiol o dreisio yw ‘Pan fydd person yn treiddio fagina, anws neu geg rhywun arall gyda phidyn, heb ganiatâd’.
Ymosodiad Rhywiol
Y diffiniad cyfreithiol o Ymosodiad Rhywiol yw ‘Gweithred o ymyrryd yn gorfforol, yn seicolegol ac yn emosiynol ar ffurf gweithred rywiol, wedi’i gorfodi ar rywun heb ganiatâd. Gall gynnwys gorfodi neu ddylanwadu ar rywun i orfod bod yn dyst i unrhyw weithredoedd rhywiol neu gymryd rhan ynddynt’.
Gall ymosodiad rhywiol gynnwys cyffwrdd â dillad, cael eich cyffwrdd neu geisio gafael arnoch yn ddigroeso, neu rywun yn rhwbio ardal y pelfis yn eich erbyn.
Mae treiddio i fagina neu anws person arall gyda rhan o’r corff heblaw pidyn, neu gyda gwrthrych, a hynny heb ganiatâd, yn cael ei ddiffinio’n ‘ymosodiad rhywiol trwy dreiddio’. Yr un yw’r ddedfryd ar gyfer y drosedd hon â threisio.
Cam-drin Plant yn Rhywiol
Ni all plentyn fyth roi caniatâd i weithgaredd rhywiol gydag oedolyn.
Pan fydd oedolyn, neu blentyn hŷn neu gymheiriad, yn codi ofn ar blentyn, yn dylanwadu arno, yn ei dwyllo neu’n ei orfodi i gymryd rhan mewn gweithgaredd rhywiol, cam-drin rhywiol yw hyn. Gall hyn gynnwys gweithgaredd â chyswllt (e.e. treisio, mastyrbio, cusanu a chyffwrdd), ynghyd â gweithgaredd heb gyswllt (e.e. siarad rhywiol cignoeth neu ddangos pornograffi i blant).
Gall oedolyn, plentyn hŷn neu gymheiriad gam-drin plant yn rhywiol.
Masnachu at Ddibenion Rhyw
Y diffiniad o fasnachu at ddibenion rhyw yw ‘pan fydd oedolion neu blant yn cael eu recriwtio, eu llochesu, eu cludo, eu darparu neu eu cael, o dan rym, twyll neu orfodaeth, i gyflawni gweithred rywiol fasnachol’. Nid oes rhaid i fasnachu at ddiben rhyw gynnwys teithio na symud ar draws ffiniau ac mae’n digwydd i bobl a aned yn y DU, ar dir y DU. Nid oes rhaid i’r ‘taliad’ am y weithred ryw gynnwys arian; gallai’r buddion gynnwys unrhyw fantais y mae’r masnachwr (neu berson arall) yn ei chael, fel budd neu fraint personol ynghyd â buddion ariannol neu eiddo.
Camfanteisio’n Rhywiol
Camfanteisio’n Rhywiol ar Blant yw cymryd mantais ar blentyn neu berson ifanc trwy anghydbwysedd grym, i orfodi neu ddylanwadu arnynt i gymryd rhan mewn gweithgaredd rhywiol. Gall camfanteisio gynnwys rhoi pethau iddynt, fel rhoddion, cyffuriau, arian, statws ac anwyldeb, neu gall gynnwys gorfodi, fel bygythiadau neu flacmel. Gall y plentyn neu’r person ifanc gredu bod y gweithgaredd rhywiol yn gydsyniol, ond ni all plentyn roi caniatâd i weithgaredd rhywiol gydag oedolyn. Nid yw camfanteisio’n rhywiol bob amser yn cynnwys cysylltiad corfforol, a gall ddigwydd trwy ddefnyddio technoleg (fel gorfodi rhywun i rannu delweddau rhywiol cignoeth ar-lein).
Aflonyddu Rhywiol
Y diffiniad o Aflonyddu Rhywiol yw ‘ymddygiad digroeso o natur rywiol sydd: yn ymyrryd â’ch urddas; yn gwneud i chi deimlo’ch bod yn cael eich bygwth, eich iselhau neu’ch bychanu; yn creu amgylchedd gelyniaethus neu atgas’.
Gall aflonyddu rhywiol gynnwys profiad o rywun yn dinoethi ei hun yn anweddus i chi, anfon delweddau o natur rywiol atoch neu eu rhoi i chi, neu fygythiadau rhywiol neu ymddygiad rhywiol digroeso tuag atoch.
