``Fe wnaethoch chi achub ein teulu.``

Canolfan Atgyfeirio Ymosodiadau Rhywiol yw SARC. Mae SARC yn helpu pobl sydd wedi cael eu heffeithio gan drais rhywiol neu ymosodiad rhywiol.

Bydd un o’n gweithwyr argyfwng yn cyfarfod â chi yn y SARC ac yn trafod eich opsiynau gyda chi. Os siaradoch â’r heddlu i ddechrau, byddan nhw’n ein ffonio ni i drefnu i chi gyfarfod â gweithiwr argyfwng yn y SARC. Os nad ydych am siarad â’r heddlu, gallwch gyfeirio’ch hun trwy ffonio 01685 379 310 neu trwy gysylltu â ni trwy ein gwefan i ni eich ffonio chi nôl.

Mae ein canolfannau SARC ar agor 24 awr y dydd, 7 diwrnod yr wythnos, bob dydd o’r flwyddyn.

Mae ein cynghorwyr ISVA yn cynnig cymorth parhaus. Gall y cymorth fod yn wahanol i bob unigolyn, ond gall gynnwys:

• Eich cynorthwyo chi ag achosion llys.
• Siarad ag eraill ar eich rhan a rhoi’r wybodaeth ddiweddaraf i chi am unrhyw ddatblygiadau.
• Eich cynorthwyo chi â’ch lles emosiynol, fel strategaethau ymdopi cadarnhaol, a chynnig man diogel a chyfrinachol i chi lle y gallwch siarad.

Gallwch droi at ein cymorth, p’un a fyddwch chi’n dewis mynd at yr heddlu ai peidio. Gall ein cynghorwyr ISVA gynnig cyngor ar roi gwybod i’r heddlu neu roi gwybodaeth yn ddienw, neu mae dewis gennych fynd yn uniongyrchol at ein gwasanaethau cwnsela a lles.

Gwyddom fod trawma o drais rhywiol yn gallu llorio rhywun. Os bydd angen cymorth arnoch â rheoli hunllefau, ôl-fflachiau neu orbryder, mae gennym adnoddau a grëwyd gan un o’n therapyddion.

Os ydych chi’n ei chael hi’n anodd neu rydych mewn argyfwng, os oes angen cymorth iechyd meddwl arnoch ar unwaith neu os ydych yn meddwl am ladd eich hun, ffoniwch linell gymorth CALL 24 ar 0800 132 737.