``Oni bai am fy ISVA, dydw i ddim yn credu y byddwn i yma o hyd.``

Gall ISVA eich cefnogi i wneud penderfyniad ynghylch a ddylid rhoi gwybod i’r heddlu am yr hyn sydd wedi digwydd ai peidio. Maen nhw’n meddu ar wybodaeth arbenigol am brosesau cyfiawnder troseddol, a gallant eich helpu i ddeall eich hawliau o dan yCod Ymarfer Dioddefwyr, a beth i’w ddisgwyl. Gallant eich helpu gyda’r camau nesaf, ni waeth pa opsiwn a ddewiswch, a gallant weithio gyda chi i ddatblygu cynllun cymorth i ddiwallu’ch anghenion.

Os ydych chi eisiau gwybod mwy am rôl ISVA, gallwch ddarllen Canllaw y Swyddfa Gartref, Elfennau Hanfodol Rôl Cynghorydd Annibynnol ar Drais Rhywiol. Mae’r canllawiau’n nodi egwyddorion craidd ISVA sy’n cynnwys teilwra’r cymorth i anghenion pob dioddefwr a goroeswr unigol; darparu gwybodaeth gywir a diduedd i ddioddefwyr a goroeswyr trais rhywiol; darparu cefnogaeth emosiynol ac ymarferol i ddiwallu anghenion y dioddefwr neu’r goroeswr.

Os byddwch yn dewis adrodd, bydd ISVAs yn darparu cymorth cyn, yn ystod ac ar ôl unrhyw achos llys posibl. Maent yn annibynnol ar unrhyw sefydliad neu asiantaeth arall, gan gynnwys yr heddlu.

Os ydych chi wedi troi at ein SARC (uchod), cewch gynnig cymorth dewisol ISVA.

Os ydych yn defnyddio ein gwasanaethau cwnsela a lles, ac yn ystyried adrodd i’r heddlu, byddwn yn trefnu bod ISVA yn rhoi galwad i chi.

Gallwch hefyd hunangyfeirio at ein gwasanaethau ISVA drwy ein ffonio ar 01685 379 310.

Nid oes rhaid i chi roi gwybod i’r heddlu am yr hyn a ddigwyddodd i gael cefnogaeth lawn gan ein gwasanaeth ISVA. Fodd bynnag, os byddwch yn dewis rhoi gwybod i’r heddlu, gall ein ISVAs eich cefnogi i lywio’ch ffordd drwy’r broses cyfiawnder troseddol gyda’u gwybodaeth arbenigol am y system cyfiawnder troseddol. Byddant yn cysylltu ag eraill ar eich rhan ac yn rhoi’r wybodaeth ddiweddaraf i chi’n rheolaidd am unrhyw ddatblygiadau, gan gynnwys siarad â’r heddlu, Gwasanaeth Erlyn y Goron, gweithwyr iechyd proffesiynol, cymdeithasau tai, a chyflogwyr ac ati.

Gall ein ISVAs eich helpu gydag unrhyw un o’r canlynol:

• Cefnogaeth gydag achosion llys posib
• Eich cefnogi mewn apwyntiadau
• Siarad â chi am eich lles emosiynol, strategaethau ymdopi cadarnhaol a chaniatáu man diogel a chyfrinachol i chi siarad

Os oes achos llys, bydd eich ISVA yn trefnu ymweliad cyn y llys fel y gallwch chi gael golwg ar yr ystafell llys a chael dealltwriaeth o’r hyn fydd yn digwydd. Mae yna hefyd fesurau arbennig a chefnogaeth y gall ISVA drafod gyda chi, megis gallu rhoi tystiolaeth trwy gyswllt llys o bell fel nad oes angen i chi fynd i’r llys.

Bydd eich ISVA yn eich annog i nodi unrhyw anghenion parhaus ac i ddatblygu cynllun cymorth sy’n helpu i ddiwallu’r anghenion hyn.

Darperir cymorth ISVA wyneb yn wyneb, dros y ffôn, neu ar-lein. Mae ISVAs yn hyblyg a gall y gefnogaeth newid trwy gydol eich amser, yn dibynnu ar eich anghenion.

Mae copïau o’n polisïau a’n gweithdrefnau ISVA ar gael ar gais drwy enquiries@newpathways.org.uk.

 

Ein dyletswydd i gadw plant yn ddiogel

Os yw plentyn yn dioddef, wedi dioddef neu’n debygol o fod mewn perygl o niwed, ein cyfrifoldeb ni yw sicrhau bod ein pryderon yn cael eu hatgyfeirio at y gwasanaethau cymdeithasol neu’r heddlu. Lle bynnag y bo’n bosibl, byddem yn trafod hyn gyda chi ac yn gwrando ar unrhyw bryderon sydd gennych, y byddwn yn eu cymryd o ddifrif.

Nid yw ein ISVAs yn gwnselwyr. Fodd bynnag,maen nhw’n weithwyr cymorth arbenigol medrus iawn.

Mae ein holl ISVAs yn cwblhau hyfforddiant arbenigol achrededig cenedlaethol. Mae ein gwasanaethau ISVA oedolion, plant a phobl ifanc wedi’u hachredu trwy LimeCulture.

Os ydych chi’n cymryd rhan mewn achos llys, mae opsiwn cyfnod byr o therapi cyn-achos llys.

Yn ein tîm, mae gennym ISVAs sy’n cefnogi cymunedau amrywiol, megis pobl hŷn, plant a phobl ifanc, dynion, y gymuned LHDTC+, pobl o gefndiroedd lleiafrifoedd ethnig, pobl ag anableddau dysgu, pobl ag anghenion iechyd meddwl cymhleth, a phobl sydd wedi cael eu masnachu neu sydd mewn sefyllfa cam-drin domestig.

Bydd ISVA yn rhoi cymorth tan nad oes mwy o angen cymorth gan ISVA. Byddant yn gweithio gyda chi fel y gallwch adael y gwasanaeth yn llwyddiannus, ac mae hyn yn cynnwys cyfeirio ymlaen. Hefyd, cewch gynnig y cyfle i ddefnyddio ein gwasanaethau cwnsela a lles. Mae hyn yn ddewisol a gallwn eich helpu i ddod o hyd i’r gefnogaeth orau i chi. Os oes gennych ddiddordeb mewn darganfod mwy am ein gwasanaeth cwnsela a lles, ewch i yma.

Gall cleientiaid ail-ymgysylltu â’r gwasanaeth ISVA, yn enwedig pan fydd diweddariadau o bosibl yn dilyn euogfarn a dedfryd o garchar, e.e. ynghylch parôl.

 

Mae ein SARCs yma i gynnig cymorth a chefnogaeth ar unwaith i chi, unrhyw bryd y byddwch ein hangen (24/7). Pan fyddwn wedi derbyn galwad gennych chi neu’r heddlu, bydd un o’n gweithwyr cymorth (o’r enw gweithiwr argyfwng) yn cyfarfod â chi yn y SARC o fewn awr. Gallwch ddod â ffrind neu aelod o’r teulu gyda chi am gefnogaeth.

Pan fyddwch chi’n cyrraedd, bydd ein gweithiwr argyfwng yn cwrdd â chi, yn siarad â chi am eich opsiynau ac yn eich cefnogi trwy gydol y broses. Rydyn ni’n gwneud hyn ar eich cyflymder chi. Chi biau’r dewisiadau bob amser, a bydd Llwybrau Newydd yn eich cefnogi gyda pha bynnag opsiynau a ddewiswch. Mae gan ein SARC ystafell i ffrindiau a theulu a chyfleusterau diod, felly os byddwch yn dod â rhywun gyda chi, gallant aros mewn man cyfforddus.

Byddwn yn gwrando a byddwn yn eich credu. Bydd ein gweithwyr argyfwng yn gwneud yn siwr eich bod yn cael y wybodaeth a’r cymorth cywir, p’un a fyddwch chi’n dewis cynnwys yr heddlu ai peidio. Yn ein Canolfannau SARC, gallwn weithio gyda’r heddlu ar eich rhan a’ch cynorthwyo i siarad â nhw. Hefyd, gallwn eich cefnogi yn ystod archwiliad meddygol fforensig gyda meddyg hyfforddedig ar ein safle.

Gallwn hefyd gynnig cyngor a chymorth cyntaf; ôl-ofal meddygol ac atgyfeiriadau ar gyfer trin clefyd a drosglwyddir yn rhywiol (STIs); canllawiau iechyd rhywiol; a chefnogaeth arbenigol yn y dyddiau, wythnosau a misoedd wedyn, gan gynnwys cymorth lles, cwnsela a chymorth ISVA.

Fel oedolyn, nid oes rhaid i chi siarad â’r heddlu i gael mynediad i’n SARCs. Gall un o’n gweithwyr argyfwng neu ISVAs siarad am eich opsiynau os byddwch yn cyfeirio atom ni.

Efallai y byddwch yn penderfynu eich bod eisiau cwnsela a chymorth heb adrodd i’r heddlu. Bydd un o’r tîm yn rhoi’r wybodaeth y mae ei hangen arnoch i wneud penderfyniad gwybodus am ba opsiwn sy’n gywir i chi.

Os ydych chi’n dymuno rhoi gwybod i’r heddlu, gallwch lawrlwytho gwybodaeth ddefnyddiol yma.

Ein dyletswydd i gadw plant yn ddiogel

Os yw plentyn yn dioddef, wedi dioddef neu’n debygol o fod mewn perygl o niwed, ein cyfrifoldeb ni yw sicrhau bod ein pryderon yn cael eu hatgyfeirio at y gwasanaethau cymdeithasol neu’r heddlu.

Byddwn bob amser yn trafod hyn gyda chi ac yn gwrando ar unrhyw bryderon sydd gennych chi, a byddwn yn eu cymryd o ddifrif.

Ydy, gall unrhyw un gael mynediad at wasanaethau SARC. Maen nhw’n agored i bawb, o bob oedran, rhyw, cefndir cymdeithasol, cefndiroedd ethnig, crefyddau a chredoau, anableddau a chyfeiriadedd rhywiol.

Yng Nghymru mae llwybr pediatreg penodol erbyn hyn, felly gellir cyfeirio pob plentyn o dan 13 mlwydd oed at SARC penodol i gael y cymorth meddygol arbenigol maen nhw ei angen.

Nid yw rhai pobl yn gwybod bod gwasanaethau trais rhywiol yn gallu cynorthwyo dynion neu bobl anneuaidd, ond mae ein SARCs i bawb.

Os ydych chi wedi dioddef trais neu ymosodiad rhywiol ac rydych yn wrywaidd neu’n anneuaidd, gallwch gael yr union un lefel o wasanaeth a chymorth gan Llwybrau Newydd a byddem yn eich annog i siarad â ni. Mae ein staff yn hynod sensitif i anghenion ein holl gleientiaid ac mae gennym ISVAs sydd wedi cael eu hyfforddi i weithio’n benodol gyda chymunedau gwahanol. Mae gennym ISVAs sy’n arbenigo mewn gweithio gyda dynion, pobl LHDTC+, pobl dduon neu o gymunedau lleiafrifoedd ethnig eraill, cymunedau teithwyr, pobl hŷn, plant a phobl ifanc, pobl â phroblemau iechyd meddwl cymhleth, pobl ag anableddau neu anawsterau dysgu, a phobl sydd wedi cael eu heffeithio gan gam-drin domestig neu fasnachu pobl.

Mae SARCs ar gael 24/7.

Os byddwch yn penderfynu mynd at yr heddlu, byddant yn cysylltu â ni i drefnu i chi ddod i’n SARC. Fodd bynnag, os nad ydych chi am fynd at yr heddlu, gallwch gyfeirio’ch hun at ein SARCs.

Yn ystod oriau swyddfa, 9am-5pm o ddydd Llun i ddydd Iau, a 9am-4.30pm ar ddydd Gwener, gallwch ein ffonio ar 01685 379 310, neu ffonio un o’n swyddfeydd lleol.Y tu allan i’r oriau hyn, gallwch ffonio ein llinell gymorth y tu allan i oriau ar 07423 437 020.

Mae canolfannau SARC ym mhob rhan o Gymru.

Os nad ydych chi’n siŵr am unrhyw beth sy’n gysylltiedig â chael mynediad at SARC, gallwch siarad ag un o’n ISVAs. Gweler y wybodaeth uchod ar gyfer y gwasanaeth ISVA.

Os yw’n briodol, efallai y cewch gynnig archwiliad meddygol fforensig. Mae hwn yn cael ei wneud gan feddyg cymwysedig a phrofiadol o’r enw archwilydd meddygol fforensig (FME). Gall hyn ddigwydd ar ein safle neu efallai y cewch gynnig archwiliad mewn SARC gwahanol ond yna cewch eich cyfeirio’n ôl atom ni fel y gallwch chi gael cymorth parhaus yn lleol.

Bwriad archwiliad yw casglu unrhyw dystiolaeth fforensig a allai fod ar gael. Gall hyn gynnwys gwneud cofnod o anafiadau a chasglu unrhyw dystiolaeth DNA.

Bydd gweithiwr argyfwng yn esbonio’r broses ac yn dangos yr ystafell archwilio ymlaen llaw os ydych chi’n dymuno, a bydd yn aros gyda chi i’ch cefnogi drwy’r broses. Gallwch ddewis stopio neu gymryd hoe unrhyw bryd. Rydym yn deall bod hyn yn broses bersonol, a bydd y gweithiwr argyfwng a’r FME yn gwneud popeth posibl i wneud i chi deimlo’n gyfforddus ac i ateb unrhyw gwestiynau sydd gennych. Hefyd, gallwch ddewis bod aelod o’ch teulu neu ffrind yn mynd gyda chi, yn hytrach na’r gweithiwr argyfwng.

Yn dilyn yr archwiliad, byddwch yn gallu cael cawod mewn ystafell ymolchi breifat, byddwch yn cael eich cit ymolchi personol eich hun, a dillad. Mae gennym feintiau yn addas i bawb.

Os byddwch yn dewis rhoi gwybod i’r heddlu, gall hyn ddigwydd yn y SARC, heb fod angen mynd i orsaf heddlu. Mae gennym ystafell gyfweld gyfforddus gyda chyfleusterau recordio cynnil.

Gall y cyfweliad ddigwydd yn syth, neu’r diwrnod canlynol. Yn ystod y cyfweliad, gallwch ofyn bod y gweithiwr argyfwng yn bresennol. Ni fyddant yn gallu siarad ar eich rhan yn ystod y cyfweliad, ond efallai y byddwch yn ei chael yn fwy cyfforddus i’w cael yno fel cymorth.

Erbyn hyn, mae gan y rhan fwyaf o heddluoedd dîm pwrpasol o swyddogion sy’n ymchwilio i droseddau rhywiol ac maen nhw’n hynaws, yn brofiadol iawn yn y maes hwn ac yn sensitif i’ch anghenion.